Drottning Viðmiðunarinnar

Nú er það spurning....

2008-07-28T13:11:00.004Z

Á ég, eða á ég ekki að taka þetta blogg upp aftur?

Nú þegar Andrea mín kær er farin að velta fyrir sér kostum Blogger vs. kostum Acme, þá þyrlast upp spurningar í hausnum á mér. Og ef Blogger er farinn að haga sér sem skyldi (endalaust skráningarvesen var ástæða þess að ég hætti hér á sínum tíma) og Evert the stalker hefur hvort eð er upp á hverju einasta bloggi sem ég stofna, þá er kannski engin ástæða að útiloka þetta landsvæði drottningarinnar. Því það er ekki hver sem er sem getur verið (og vill vera) The Queen of Norm.

Ég veit það líka fyrir víst að einhverjir aðilar hlekkja ennþá inn á þetta blogg sem mitt aðalsvæði, svo kannski er það ekki al-dautt, greyið.

Bestu kveðjur, og við sjáumst næst.

Prúðuleikararnir

2007-03-25T00:09:00.000Z

Síðustu helgi greip mig ómótstæðileg þörf til hitta ættingja, og höguðu örlögin því þannig að leið mín lá á Kárastíginn, þar sem ég get fundið 4 gæðaeintök af slíku fólki. Og það var heldur betur ferð til fjár. Bæði fékk ég kaffi og góðgerðir (sem næstu gestir komu með - ekki bara eru þetta frábærir ættingjar heldur eiga þau líka frábæra vini! - ) og svo fyrstu þáttaröðina með Prúðuleikurunum lánaða.

Prúðuleikararnir voru æði. Prúðuleikararnir eru æði. Hvílík snilld sem þessir þættir eru (og hve súr sum atriðin eru) !! Og það að fá landsþekkta einstaklinga til að syngja með brúðum finnst mér líka stórkostlegt. Þarna sá ég m.a. Charles Aznavour (hver svo sem það er) syngja fyrir brúðu-grasmaðk og ræða við handbrúðu-brauð. Og Harvey Korman klæddan í skyndi upp sem risa-kjúkling eftir að hann kvartaði yfir því að sér fyndist hann svo útundan innan um "castið", verandi eina ó-brúðan.

Þrátt fyrir allar tæknibrellur nútíma kvik- og teiknimynda, þá finnast mér Prúðuleikarnir hafa elst einstaklega vel. Og varnarorð eiganda seríunnar um að þeir séu ekki eins fyndnir núna og þeir voru þegar maður var 7 ára (eða hvað það nú var) ná ekki til mín. Kannski er ég enn 7 ára í hjarta og hjärna.

MUPPARNA STYRER !!

Ekkert

2007-03-25T00:03:00.000Z

Þegar ég fór í Bónus um daginn mætti ég tveimur ungum mönnum sem voru að gefa 2ja lítra flöskur af Coke Zero. Being a sucker for free goods þá þáði ég eina slíka, þrátt fyrir allar fyrri yfirlýsingar um að þetta sull skyldi ég sko ekki drekka. Nafnið (og hvað þá auglýsingaherferðin!) væri hallærislegt og vísaði í mínum hug ekki einasta í sykurleysi, heldur líka í bragðleysi, tilgangsleysi og almennan skort á öllu góðu. En flöskuna þáði ég, og braut þar með fyrsta odd af oflæti mínu.

Það brot gekk aðeins lengra niður þegar ég opnaði flöskuna svo tveimur dögum seinna, og smakkaði drykkinn, því einhversstaðar hafði ég lesið það að einhverjum þætti áðurnefndur drykkur alls ekki slæmur þrátt fyrir fyrri trú á hið gagnstæða, og kannski, rétt kannski ætti mitt viðhorf eftir að breytast. Það væri þá betra að uppgötva það fyrr en síðar og jafnvel þá í einrúmi, verandi yfirlýsingaglöð manneskja sem vílar ekki fyrir sér að segja skoðun sína á vörum og þjónustu (stundum). Prufuna endurtók ég svo aftur tveimur dögum síðar, svona til að endanlegar niðurstöður myndu síður litast af ástandi mínu og bragðlaukanna í fyrra skiptið.

Niðurstaðan : Coke Zero á tvennt sameiginlegt með íslensku vatni. Það er bragðlaust og gott kalt.
Munurinn er hinsvegar sá að á meðan ég get svolgrað í mig 1,5 líter af vatni á 8 klst. vinnudegi, þá kem ég bara niður einu glasi af Coke Zero á sama tímabili. Því einhvernveginn þá ... er Núllið bara ekki nógu gott.

Flickr !

2007-03-17T21:21:00.000Z

Jæja, nú er ég farin að reyna (eftir bestu getu) að setja myndir á Flickr.
Hér má finna þær.
Enn sem komið er eru bara komnar inn myndir frá Kaupmannahöfn og nokkrir munaðarleysingjar, en úr því verður vonandi bætt í næstu viku.

2007-02-23T09:53:00.000Z

Og í framhaldi af minni færslu þá vil ég benda á aðra af sama meiði hjá Norninni.
Færsluna er að finna hér.

Fordómafulla smáþjóðin í norðri

2007-02-23T09:06:00.000Z

Það er þá orðið opinbert: Íslendingar eru ekki lengur "hipp og kúl" heldur kreddufullir smáborgarar á eyju langt úti í hafi þar sem dýrtíðin er ævarandi árstíð.

Klámfólkið má ekki koma í hóp til Íslands. Og bara helst ekki koma yfir höfuð. Allavega ekki gista á "virðulegum" hótelum. Kannski ekki heldur á tjaldsvæðinu í Laugardal. Því fólk sem hefur áhuga á klámi er sko ekki velkomið hér. En bandarískir útlagar (Bobby Fisher) og erlendir ofsastjórnmálamenn (forseti Kína) eru velkomnir. Og vinum hins íslenska forsetavalds skyldi enginn mótmæla!

Kannski má snúa þessari þjóðarstefnu upp í allsherjar lygavef þar sem Íslendingum er talin trú um að þeir séu hreint út sagt aaæææði og að aaallir elski okkur. T.d. væri hægt að skylda alla blaðamenn, komi þeir tveir eða fleiri saman, til að skrifa eina grein um hversu frábær og fögur land & þjóð eru, og fá hana birta í Reykjavík Grapevine. Algjörlega óháð því hvort þessir blaðamenn séu komnir hingað í sumarfrí eða í persónulegum tilgangi. Og því líkt egóbúúst sem slíkar greinar yrðu! Vítamínsprauta fyrir smáþjóð með smáþjóðarkomplexa.

Ég vona að Bændasamtökin (sem eiga Hótel Sögu) verði illa úti í sumar fyrir það að geta ekki staðið með sínum gestum. Og ég vona að íslenskir stjórnmálamenn lendi í því í sínum næstu heimsóknum erlendis að vera spurðir hvort Íslendingar muni héreftir óska þess að fólk útlisti nákvæmlega atvinnu, áhugamál og tilgang komu sinnar við kaup á farseðli til Íslands. Og ég vona að fræga fólkið hætti að koma hingað til lands, svo að Íslendingar átti sig á því að Ísland er ekki hipp og kúl, heldur bara lítið land byggt fámennri þjóð með svo stórt egó að það skyggi á raunsæi þeirra.

Við erum nú opinberlega hleypidómafull og þröngsýn þjóð.
TIL HAMINGJU ÍSLAND !!!

skróparar...!

2006-12-26T13:38:00.000Z

Þeir sem ekki mættu í laufabrauðsútskurðinn fyrr í mánuðinum voru:

Ragnheiður Hlíf
Atli Már
Björn Óðinn
Eyrún
Magga
Siggi

Þau einu sem hafa löggilda afsökun voru þau þrjú síðastnefndu, því þau eru öll hinumegin á hnettinum og áttu ekki "heiman"gengt.
Hin verða öll úthrópuð hér þegar heilinn [minn] kemst aftur í notkun eftir jólafrí.

2006-12-15T09:59:00.000Z

Er einhver sem ég þekki á leið til Dalvíkur fyrir jólin? Frá Höfuðborgarsvæðinu? Ef svo er, þá má sá hinn sami (eða sú hin sama) gjarnan hafa samband við mig, svo hann/hún geti gert mér greiða (og glaðst yfir því í hjarta sér).

Því það er svo jóló.

Ilmur af jólum...

2006-12-14T14:34:00.000Z

Á morgun verður laufabrauðsútskurður í Holtsbúðinni!!
Þrátt fyrir að annað höfuð ættarinnar sé erlendis að sóla sig og dansa samba, þá reikna ég fastlega með að þær móðir mín og Guðný frænka (eða Herdís?) muni halda uppi hraða og afli í útflatningu og steikingu.

Þá verðum við hin bara að standa okkur í útskurðinum.

Og þeir sem skrópa í útskurðinn án þess að framvísa löggildri og góðri afsökun í dróttkvæðum hætti * verða nafngreindir og úthrópaðir hér á síðunni.

* við nánari íhugun hefur verið ákveðið að taka einnig við löggildum og góðum afsökunum í formi limra, ferskeytlna og allra hátta sem Eddukvæðin hin rammíslensku (líkt og laufabrauðið) bjóða upp á.

miðvikudagstuð...

2006-12-13T12:40:00.000Z

Var í heimsókn hjá frænku minni í fyrrakvöld, sem er kannski ekki í frásögur færandi þar sem ég á nokkrar af því taginu, en það sem bar á góma var nokkuð merkilegt.

Hún er þrítug eins og ég (plús 6 mán.), einhleyp og barnlaus (eins og ég líka), og fær að heyra það ansi oft í vinnunni hvað hún sé heppin, hún hafi nú bara fyrir sér einni að sjá, og hvað það hljóti að vera mikill munur (= ódýrt) að vera bara einn munnur að metta og hvenær hún ætli nú að fara að koma með barn. Sem betur fer virðist það nú bara vera ein samstarfskona hennar sem lætur dæluna ganga um þessi mál, en það sem samt einni of mikið. Þetta eru óskaplega vanhugsaðar athugasemdir, vegna þess að :

a) Af kostnaði við að halda heimili þá eru matarinnkaup langt frá því stærsti hlutinn. Sérstaklega ef maður kæmist upp með það að versla bara fyrir einn og þyrfti aldrei að henda mat. Langstærsti hluti launanna fer í húsnæðið, og það fær maður ekki á helmingsafslætti bara af því að maður er einn og með einar tekjur. Aðrir kostnaðarliðir sem ánægjulegt væri að geta deilt með öðrum eru húsgögn, nettenging, fastagjald síma, tölva, og jafnvel sjónvarp. Þetta fær maður heldur ekki á helmingsafslætti ef maður hefur bara einar tekjur til að greiða af.

b) Kostnaður við það að eignast barn er bara ansi stór biti fyrir heimili sem hefur ekki nema einar tekjur (og jafnvel fyrir þau heimili sem hafa tvennar). Matarkostnaðurinn rýkur kannski ekki upp úr öllu valdi við það eitt nema kaupa þurfi sérfæði ofaní barnið. Húsnæðiskostnaður þarf ekki að aukast heldur, allavega ekki fyrst um sinn. En maður minn, allt hitt! Bleyjupakkar! Barnarúm! Barnaföt! Grindur fyrir stiga! Dagmamma! Barnavagn! Jafnvel bíll, nema viðkomandi treysti sér með reglulegu millibili til að bera barn framan á sér og 2-3 troðfulla poka af matvörum í höndunum. Og þann bíl þarf þá að tryggja, fylla reglulega af eldsneyti og mæta ófyrirséðum viðgerðum.

Það er líka alveg merkilegt hvað sumum finnst miklu muna ef þau eru tvö, þá kosti svo og svo mikið fyrir þau saman að fara út að borða eða í bíó eða í Bláa Lónið, vs. ef viðkomandi er bara einn þá kosti það helmingi minna. Þetta fólk virðist gleyma því að hlutfallslega er verðið nákvæmlega það sama; ein manneskja = einar tekjur = einfalt verð.

Þannig að, ef þið sem hafið bara einn munn að metta mætið athugasemdum á borð við hversu gott það hljóti að vera, verið þá snögg að benda viðkomandi á hversu mikill munur það sé líka að fá að sjá um greiðslu skulda og reksturs heimilis af einum tekjum.
Ef einhver er spyr hvort það sé ekki kominn tími á barn (hvort sem þú ert karl- eða kvenkyns), þá er hægt að segjast vera að safna fyrir tæknifrjóvgun, að ásættanleg leigumóðir hafi ekki fundist eða að gott genamengi sé ekki á hverju strái. Eða að maður sé hreinlega ófrjór sökum sjúkdóms/slyss/fæðingargalla. Því hvað kemur það öðru fólki við af hverju ekkert barn sé komið eða á dagskrá?

að dreyma tölur

2006-12-12T09:35:00.000Z

Veit einhver hvað það þýðir að dreyma tölur / upphæðir?
Sá fróðleiksmaður (eða -kona) er þá vinsamlegast beðin(n) um að gefa sig fram.

Um helgina dreymdi mig nokkra ósköp furðulega drauma, en þó stóð upp úr einn draumur þar sem einhver hafði látið flytja dágóða upphæð af bankareikningi annars yfir á bankareikning einhvers fyrirtækis (hvers nafn var skammstafað með 4-5 gráum stöfum, feitletruðum) og þaðan yfir á sinn eigin reikning. Upphaflegi eigandi fjárupphæðarinnar þurfti því að taka stórt lán til að geta mætt útgjöldum sínum, og var ekki sáttur.
Til að gera langa sögu stutta og sleppa öllum tilfinningalegum hræringum (sem og hvaða leikarar léku þetta fólk í draumnum) þá eru tölurnar sem máli skipta, eftirfarandi:

Upphæðin sem stolið var : 1200000(0)
Upphæðin sem bankalánið nam : 1.183.000 (eða 11.830.000*)
Mánaðarleg afborgun af láninu : 135 þús.

* Stolna upphæðin var ansi há (fyrir meðalmanninn, en hljómaði þó í hjarta mér nær 60 milljónum en "aumingjalegum" 12), og því tel ég 12 milljónir vera mun líklegri en 1,2. Þar sem sú upphæð birtist mér þannig að fyrst kom 12 og svo runa af núllum í kjölfarið, þá get ég ekki svarið fyrir hversu mörg þau voru. Bankalánið, sem var næstum jafn hátt og stolna upphæðin, birtist hinsvegar á afar skilmerkilegan hátt með punktum á réttum stöðum (sjá að ofan). En hafi stolna upphæðin verið 12 milljónir þá hlýtur (sjón)minni mitt að hafa eitthvað brenglast og fyrsti punkturinn á eftir báðum 1-unum í staðinn fyrir að vera á milli þeirra.
Mánaðarlega útborgunin var hinsvegar sögð [eitthvað meira] upphátt [en hinar] og því birtist hún einungis sem 3ja stafa tala með "þús." fyrir aftan.

Og spurning vikunnar er : Veit einhver hvað þetta þýðir?

jólalögin

2006-11-16T13:19:00.000Z

Í Blaðinu í gær voru nokkrir þekktir einstaklingar spurðir út hvert væri þeirra uppáhalds jólalag, og hvaða lag þeir þyldu síst (eða fyndist lélegast). Hefði ég verið spurð út í hið síðarnefnda, þá hefði ég svarað því að þau jólalög sem ég þoli síst eru þau sem innihalda illa saminn og illa hugsaðan texta. Texta sem byggist á því að troða saman í texta eins mörgum orðum og hægt er úr "jólaorðapottinum", og tengja þau með sagn- og lýsingarorðum. Textar sem segja ekki neitt nema að vitna í Bókarsögur og eru að tapa sér í sögurómantíkinni án þess að skeyta um hvort textinn sé rökréttur*, eða vitna í endalaust gjafaflóð og ljósaflóð og hamingju og jólatré án þess að vera í raun að segja annað en "Mér þykir svo óóóógeðslega gaman á jólunum og þá eru pakkar og þá er svo gaman og það er svo jóló að þykja svona gaman á jólunum". Eða því sem næst. Merkilegt hvað lendir í ruslakistu jólanna.

* Ein íslensk þýðing á jólatexta (hvers frumgerð ég þekki því miður ekki) er á þennan veg: "[F]æddi hún lausnarann hreinni af náð."
Mikið er það nú gott að María skuli hafa miskunnað sig yfir mannkynið og ákveðið að a) ganga með barnið sem hún varð ófrísk af, og b) neita barninu ekki um fæðingu 9 mánuðum síðar. Hún hefði svo auðveldlega haldið því fyrir sig alveg þar til hún dæi og barnið með því. Sem hefði væntanlega gerst mun fyrr en síðar ef barnið hefði fengið að kúra innanborðs í henni langt fram yfir mennskan meðgöngutíma.

Af öðru: föllum við Íslendingar í hrönnum fyrir hlutum/fyrirtækjum sem heita samheitum, eða er það eitthvað sem dagblaðamógúlar trúa bara? Svo ég taki nú dagblaðaflóru (flóru, því pappamassi var eitt sinn tré) okkar sem dæmi. Þar heita blöðin þeim "sérstæðu" nöfnum Blaðið, Fréttablaðið, Morgunblaðið, Dagblaðið... Af þessum nöfnum finnst mér þó Morgunblaðið skást, því það kemur altént á morgnana, meðan öll hin (nema, eins kaldhæðið og það er, Dagblaðið sjálft) falla undir hið almenna samheiti "dagblöð" því þau koma út nánast eða alveg daglega, eða "fréttablöð" því þau eru jú uppfull af fréttum héðan og þaðan.

Hvenær ætli einhverju sjéníinu detti í hug að gefa út blað sem mun heita "Síðdegisblaðið" eða "Kvöldblaðið", eða jafnvel "Virkra-daga-blaðið"? Því þau nöfn eru enn laus, eftir því sem ég best veit.

Ef þetta eru þau nöfn sem Íslenskum blaðaútgefnendum detta í hug, þá vona ég að einhver sýni það frumkvæði að hrista aðeins upp í þessu og gefa út "Alltaf-nema-á-þriðjudögum*" (*eða hvaða vikudegi sem er). Það væri þá allavega gaman að vitna í það blað; "Já, ég sá það í Alltaf-nem'á-þri'judö'm að þeir ætluðu að taka upp Árna-málið..."

Hopscotch, eða elskhugi Helenu

2006-10-09T23:19:00.000Z

Já, París var það, heillin!
Nú er París á næsta leiti og ég hef fengið leiðbeiningar varðandi það hvernig ég komist inn í opna íbúð í úthverfi Parísar til að skila af mér farangri svo ég geti notið borgarinnar með sem fæst aukakíló. Það tekur tvær lestarferðir, göngu fram hjá einhverju pósthúsi, kóðainnslátt og labb upp á 2. hæð. Eeeekkert mál, er mér sagt. Kemur í ljós, kemur í ljós.
Ýmislegt annað hefur komið í ljós, þar á meðal það að gestgjafi minn á aðeins eitt handklæði eins og stendur (að eigin sögn) og því mun ég taka með mitt eigið svo ég geti nýtt mér sturtuaðstöðuna á staðnum án þess að þurfa að gjalda þess með klósettpappír. Og eins og segir í góðri bók þá er ekki slæmt að vera "maður sem veit hvar handklæðið hans er", og þar sem "konur eru líka menn" þá reikna ég fastlega með að þetta eigi við mig líka.

Hinir teygjanlegu fermetrar

2006-10-04T11:48:00.000Z

Þetta var skráð í gær. Vegna tengslaleysis Blogger þá tókst ekki að pósta þetta þá.

Hér hefur töluvert verið kvartað yfir bloggleysi, og mun ég bæta úr því með kvörtun úr mínu horni. Kannski er þetta ekki eiginleg kvörtunarfærsla þar sem ég er væntanlega ekki að kvarta við neitt ykkar sem les færsluna, og svona kvartanir út í loftið flokkast á þann líklegast undir pirringsútrás.

Það sem er nýtt af mér að frétta er væntanlega það sem flestir vina minna vita nú þegar; flutningsmál. Ég er flutt af svæðinu utan borgarinnar og inn í höfuðborgina sjálfa, nú í hjólafæri við vinnuna og miðbæinn og ekkert nema gott um það að segja.
En af leigusalanum segi ég farir mínar ekki fyllilega sléttar. Þegar ljóst var í sumar að íbúðin skyldi losna með haustinu þar sem þáverandi leigjanda (mér vel kunnugum) byðist hentugra húsnæði einhverntíman með haustinu, þá bauð sá leigjandi mér meðmæli í þessa tilteknu íbúð, sem ég þáði. Og í samtali við leigusalann var talað um að stærð íbúðarinnar væru 38 fm. auk fleiri fermetra af gólffleti þar sem íbúðin er töluvert mikið undir risi. Umtalað verð var 45 þús. á mánuði með hita; rafmagn skyldi greitt sér. Þetta leist mér mjög vel á, og þrátt fyrir að eldhúskrókurinn og baðherbergið séu óþægilega mikið undir súð og íbúðin einungis innangeng frá forstofu leigusalans, þá sá ég þetta sem ágætis verð og tók því þegar mér var tilkynnt (í júlí) að þau hjónin hefðu ákveðið að leigja mér.

Svo klárast sumarið og í byrjun annarar viku septembermánaðar flyt ég inn. Þar sem ég var ekki búin að finna leigusamning (því ég vildi hafa einn slíkan) og síðar vegna anna í vinnu og námi, þá ræddum við ekkert um framvindu, greiðslufyrirkomulag og slíkt fyrr en rétt fyrir þessi mánaðarmót þegar ég birtist með samninginn (enda vantaði mig líka upplýsingar um bankareikning til að leggja inn á, svo ekki var seinna vænna).

Þegar ég bar samninginn minn undir fyrri leigjanda í því skyni að fylla sem mest út áður en ég bæri hann til undirskriftar, þá kom í ljós að á þeim samningi stendur að íbúðin sé ekki nema 30 m2. Leigusalinn skráði það hinsvegar á samninginn minn að fermetrar séu tæpir 40, og virtist ekkert kannast við neitt minna þegar ég síðar minntist á mismun þess samnings sem við gerðum og þess sem gerður var fyrir 2 árum við annan aðila (mun sem ég var þá búin að fá endurstaðfestan). Þar sem þessi mismunur pirraði mig töluvert þá ákvað ég að hringja í Fasteignamat Ríkisins til að fá botn í þetta, og geta þá hætt að pirra mig ef íbúðin væri nær 38 m2 en 30. Steininn tók úr þegar mér var þar tjáð að löglegir fermetrar væru 26. Tuttuguogsex! Og þrátt fyrir að ég viðurkenni hentugleika ríflegs gólfpláss (sem nýtist þó ekki fyllilega) þá finnst mér töluvert muna á 26 m2 og "tæplega 40"!!

Annar steinn sem samningurinn steytti á, var sú upphæð sem leigusalinn áætlaði mér í rafmagns- og hitanotkun. Því nú var hitinn skyndilega ekki inni í leiguupphæðinni, ekki er enn búið að skipta rafmagninu (nokkuð sem ég hélt að hefði verið frágengið í júlí þegar ég ræddi við hann) og hann taldi rétt að orkunotkun mín yrði 5000 kr. á mánuði.
Eftir að hafa rætt við 4-6 mismunandi aðila þá komst ég að þeirri niðurstöðu að 5000 kr. á mánuði fyrir einstakling sem ekki á þvottavél, þurrkara né örbylgjuofn, eldar sjaldan og horfir lítið á sjónvarp, í 26 m2 (ekki 38!) risíbúð væru afar ríflega áætlaðar, og minntist á það við leigusalann. Sá vildi nú kanna málið betur og spyrjast fyrir um það víðar, og í dag hafði hann svo samband við mig og tjáði mér að Orkuveitan segði sér að 4500 kr. væru viðmið fyrir einstakling í íbúð af þessari stærð ("tæplega 40 m2"). Þessi sama Orkuveita vildi ekki gefa mér upp neina áætlun, "hvort sem það eru 1800 eða 2000 kr. eða hvað" þegar ég hringdi í gær, en tjáði mér að ég yrði bara að komast að samkomulagi við eigandann. En þar sem ég vil ekki koma upp illindum tók ég því hundsbiti og játti þessum dómi leigusalans bara. Mér finnst þetta samt sem áður afar grunsamleg tala í ljósi þess að ég greiddi að meðaltali 3800 kr. á mánuði fyrir um 70 m2 íbúð þegar ég bjó á Skagaströnd, og þar er allt hitað með rafmagni því jarðhiti finnst ekki.

Ég geri mér alveg grein fyrir því að leiga hefur almennt verið að hækka, en mér finnst full svart að stækka íbúð á pappírum og hækka leiguverð með því að smyrja ríflega á áætlaða orkunotkun eftir að munnlegt samkomulag hefur verið gert. Því hefði ég vitað í upphafi að okkar munnlega samkomulag væri svona sveigjanlegt hefði ég haft augun opin fyrir einhverju öðru líka. Mér finnst líka all merkilegt að þó þau segist ekki geta leigt mér á sama verði og fyrri leigjanda (breyttir tímar, hún var fyrsti leigjandi o.s.frv.) að þau geti heldur ekki leigt mér á sama fermetrafjölda og henni.

Og nú sé ég mér ekki annað áhugavert að gera en að kynda vandlega upp í ofnunum og kveikja ljósin sem oftast og mest svo ég geti nýtt mér að sem mestu leyti þá orkunotkun sem verið er að láta mig greiða.

2006-10-03T23:38:00.000Z

hmmm...

eilífar annir

2006-09-24T22:31:00.000Z

Vegna anna hefur ekkert verið skráð hér lengi. Vegna anna verður tæpast neitt skráð fyrr en líða tekur á vikuna.

Flutningar hafa staðið fyrir dyrum (og standa enn, svo að segja). Nám í HÍ tekur sinn toll af frítíma og vinnan af vinnutíma. En. Það verður ekki alltaf svoleiðis. Þegar flutningarnir eru yfirstaðnir og betra skipulag kemst á heimanám þá er ekki ólíklegt að vér grípum í lyklaborð og skráum hversdagslegar vangaveltur vorar mun örar en hefur verið undanfarið. So bear with me.

sorrý...

2006-08-27T20:20:00.000Z

Nornin hafði rétt fyrir sér, heill mánuður án bloggs er hreint og beint glatað.
Og þrátt fyrir að ég hafi ekki séð mér tilefni til bloggs þá hefur engu að síður ýmislegt gerst. Ég hef ferðast um Reykjavíkurtjörn á árabát. Ég hef byrjað í nýrri vinnu og næstum því hætt í þeirri gömlu. Ég hef misst frænku mína í hendur krabbameins. Ég hef keypt nýja myndavél sem ég er mjög ánægð með. Ég hef komist að því að neysla í ágústmánuði var of mikil og heitið því að taka mér tak. Ég hef fengið já-yrði fyrir íbúðarleigu í hverfi 104 og mun flytja í byrjun september, eftir 6 daga vinnuferð til Sviss. Og ég hef gróflega mælt geisladiska- og bókaeign mína í metrum.

Niðurstaða mælinga:
geisladiskar : 3,5 hillumetrar
bækur : tæpir 10 hillumetrar - og þá eru ótaldar allar þær bækur sem nú hírast í kössum úti í geymslu.

Ég sé hinsvegar ekki fram á að koma öllum þessum hillumetrum fyrir í risíbúðinni, svo brátt hefst hin sársaukafulla ákvarðanataka um hvaða bækur skuli fluttar með, og hverjar munu enn um sinn eiga heimili í Holtsbúðinni.

fyrirspurn til ættingja minna í móðurætt

2006-07-26T09:12:00.000Z

Hvað eruð þið aumingjarnir að gera um Verzlunarmannahelgina?

RSVP

nýtt áhugamál

2006-07-20T01:01:00.000Z

Ég hef fundið mér nýtt áhugamál.
Ég er að spá í að kynna mér þá möguleika sem gluggatjaldaræktun hlýtur að bjóða upp á. Almennileg gluggatjöld* eru, eins og flestir vita, hengijurt líkt og lóbelía. En þar sem eðli þeirra er fyrst og fremst að vaxa frá byrjun að enda, skiptir það þá máli hvort byrjunin hefst uppi eða niðri? Væri ekki hægt að rækta gluggatjöld sem yxu upp á við í stað þess að vaxa niður?

*Með almennileg gluggatjöld vísa ég til þeirrar klassísku gerðar sem er lóðrétt og bein, en ekki þessi innræktuðu og erfðabreyttu krúsídúlluskreytitjöld.

Ég auglýsi jafnframt eftir eiganda að svartri hettupeysu sem varð eftir í afmælisveizlunni minni.
[síðari viðbætur : Eigandi peysunnar er að öllum líkindum Silla, og hún gaf sig ekki fram heldur varð ég að hafa uppi á henni]

hvað kostar sístreymi hugans?

2006-07-05T21:25:00.000Z

Pósturinn hefur verið að auglýsa hugskeyti. Auðvitað má alltaf finna nýja merkingu í gömlum orðum, en þar til fyrir stuttu hélt ég að það kostaði ekki neitt að senda einhverjum hugskeyti, né að það krefðist einhverra milliliða. En eftirfarandi dæmi er tekið beint af síðu Póstsins :

Verðskrá fyrir skeytaþjónustu Póstsins
Verðskrá fyrir skeyti innanlands

Hugskeyti
Þjónustusími/pósthús 930 kr.
Skeyti móttekið rafrænt 830 kr.

Hvað ætli sítenging kosti þá?

2006-06-25T13:44:00.000Z

Það sem ekki fór á bloggið um daginn, var að samkvæmt venju var Þingblót á Þórsdegi í 10. viku sumars, sem féll á fimmtudaginn síðasta. Þar voru formlega vígðir 2 nýjir goðar, 2 börn "vígð" í félagið (hvort annað fékk nafngiftarathöfn líka gæti verið). Svo var etið við eða innan (allt eftir behag) tjalds þar í grennd, og dansk-íslenska tríóið Kraukan spilaði. Ansi áhugaverð hljóðfæri sem þeir kumpánar hafa í fórum sínum, en verra þótti mér að eini Íslendingurinn í hópunum skyldi ekki kunna þjóðkvæðin betur en svo að tvö erindi (af þeim 2-3 sem þeir sungu) Krummavísna innihéldu villur. "Krummi svaf í klettagjá" varð "Krummi sat...", og þegar að "krunk, krunk , því oss búin er krás á köldu svelli" kom, þá var sungið eitthvað allt annað en "búin er" sem hvorki ég né Andrea gátum greint hvað væri. Mamma talaði líka um annað lag sem hún hafði heyrt þá syngja á Víkingahátíðinni, þar sem hún taldi þá fara rangt með texta. Og þeir voru engan veginn búnir að "syngja sig saman" sem mér finnst að eigi ekki að gerast hjá fólki sem stígur opinberlega á stokk ár eftir ár.

Niðurstaða föstudagskvöldsins var svo "a little from column A, a little from column B" en án alls áfengis.
Annars höfðu atburðir kvöldins verið skemmtilegir, óviðbúið stuttir en skemmtilegir.
Fór í Heiðmörk með Huldu, Sillu og Andreu í klukkustund og hálfa, en þar sem ekki virtist þörf á að skipuleggja það neitt frekar fyrirfram þá fór kvöldið ekki eins og ég hafði reiknað með.

Silla og Hulda Sif, beautiful as ever

Grasið vandlega flatt út með látum og hlátri

og Haraldur brenndur til kaldra kola.

2006-06-24T00:19:00.000Z

Ég er í eitthvað svo mikilli sálrænni krísu núna, en þeir vinir/vinkonur mínar sem ég gæti hugsað mér að ræða það við eru öll með ung börn og því líkast til farin að sofa núna, eða komin í ró.
Valið stendur því um tvennt :

a) fara að sofa núna (sem mér finnst hálfgerð synd á Jónsmessunótt) og reyna að gleyma öllu, eða
b) drekka mig sótfulla og steypa mér í þunglyndi.

Spennandi val.

1025 - 1 = ?

2006-06-08T12:54:00.000Z

Ég var gestur nr. 1025, Þarfagreinir hafði áður lýst því yfir að hann hygðist verða gestur nr. 1024 og því hlýtur það að hafa verið eitthvað eftirsóknarvert.
Því auglýsi ég hérmeð eftir þeim gesti, viðkomandi hlýtur að launum símtal frá mér (að því tilskildu að hann/hún hafi síma og sé staddur/stödd hérlendis).

Stendur fyrir dyrum

2006-06-08T12:49:00.000Z

stórafmæli.
Sökum anna & leti & skipulagsbreytinga verður hátíðahöldum frestað fram í miðjan júlí.
Nánar auglýst síðar.

mikið hlakka ég til ...

2006-05-31T21:18:00.000Z

... helgarinnar.

2006-05-29T16:55:00.000Z

Hér er mikið að gera við að fara í gegnum myndmenntamöppur 79 nemenda, gefa þeim einkunn og/eða umsögn fyrir það fag, og um 50 þeirra fyrir smíðafagið líka. Sú einkunn verður byggð á vinnu og hegðun í tímum síðustu vikur eftir því sem minni mitt dugir til, þar sem nú hafa flest verk verið send heim svo þau dagi ekki uppi í skólanum (eins og virðist hafa verið ansi sterk tilhneiging síðustu ár...). Ég ætla rétt að vona að ég þurfi ekki að meta textíl-vinnuna þeirra eldri líka; þau fengu 2-3 tíma í því og þeir fóru að mestu í það að klára verkin sem þau voru löngu byrjuð á (og mér fannst ég þurfa að gera allt of mikið fyrir allt of marga... Ég þyrfti að hækka eigin vinnueinkunn á kostnað nemendanna...).
Skólaslit á föstudaginn, ég þarf að skila af mér einkunnum/umsögnum þessara tæplega 80 nemenda á miðvikudag og taka til í tveimur skólastofum og tveimur geymslurýmum og ... og ...

... og því verður væntanlega ekkert bloggað fyrr en hægist um. Miiiikið hlakka ég til.

888

2006-05-22T23:16:00.000Z

... og það var ÉG sem var gestur nr. 888 á þessari síðu !!
Í Kína er 8 happatala, svo kannski er þetta góðs viti

Hvað skal gera ?

2006-05-22T23:08:00.000Z

Nemendasýning eftir 2 virka daga og eina morgunstund. Semsagt, kl.16 á fimmtudag. Enn er innan við helmingur verka búinn að skila sér. Ég hef ekki nema eina eyðu til að stunda verkstjórn (og fá aðra kennara til að hjálpa mér), á morgun er fundur strax kl. 15 og þegar honum lýkur nennir varla neinn að vera lengur í skólanum, á miðvikudag er óvissuferð kennara kl. 17. Kennslu hjá mér lýkur bara en tveimur klst. fyrr. Og spurning dagsins er :
HVERNIG Á ÞETTA AÐ TAKAST ??!?? Mér er sagt að ég eigi endilega að nýta aðra kennara í að koma sýningunni upp, en á ég þá bara að rétta þeim hluti og segja þeim að hengja upp eða setja á hillur eða .... meðan ég er í kennslu ? Þarf ég ekki að vera verkstjóri ?

Og í þokkabót er hér hvít jörð.

Snön ligger vit på taken.
Endas Tomten är naken.

markaðsetning dauðans ?

2006-05-14T00:43:00.000Z

Ekkert kjaftæði, Marxismi er málið ! Og nú í fljótandi formi !

gamlar fréttir

2006-05-08T23:32:00.000Z

Þetta reit ég einhverntíman í síðustu viku, þegar ég var ekki nettengd en hafði þörf fyrir að tjá mig. Þar sem ég skrifa svo sjaldan ætla ég að láta þetta fljóta innan um Lyngholts-færslur.

Það er nú orðið augljóst. Ég er eins og versti batsjelor. Ísskápurinn minn inniheldur að vísu meiri mat nú en áður, en það innihaldið er samt sem áður fremur ósamstætt. Gulrætur í poka, heill ananas, ávaxtasafi, flatkökur, smjör, pepperoni, kaffi og hvítkál. En matreiðslan. Það er hún sem kemur algjörlega upp um mig. Kvöldmaturinn í gær, sem etinn var á síðasta hálftímanum fyrir miðnætti, samanstóð af 3ja-mínútu-núðlum, appelsínu og kaffi. Og þrátt fyrir að vera fullkomnlega sátt, þá geri ég mér fulla grein fyrir hve þetta er glatað.

2006-05-08T21:23:00.000Z

Svona lítur garðurinn út núna.

Kveðja frá Hvammstanga

2006-05-07T22:48:00.000Z

Ég eyddi helginni á Hvammstanga. Í Lyngholti af Helguhvammslandinu, nánar tiltekið (eða Kothvamms?) og naut þar veðurblíðu, fuglasöngs og hvítvíns. Sökum óuppgerðs pirrings skráði ég heldur stuttlega í gestabókina, en vonandi verður bætt um betur næst.

Tilgangurinn með þessari færslu er hinsvegar vakning máls á framtíð fyrrum grænmetisgarðsins, og bið ég ættingja mína í móðurætt því að sperra upp augun og lesa það sem eftir kemur. Hinir mega hætta þegar þeir vilja og verða ekki krafðir álits (en mega að sjálfsögðu skilja eftir spor sín í athugasemdakerfinu hér að neðan).

"Græmetisgarðurinn", sem eftir mínu minni hét reyndar ekkert sérstakt, er það svæði þar sem ræktaður var rabbabari og gulrætur og fleira gaf þeim ættum, og reykkofinn stóð við. Þar er allt í órækt. Allt-allt-allt. Grasið næði fullvaxinni konu (því nú erum við mest konur í arflegg) hálfa leið upp í mitti ef það gæti staðið upp á endann. Trén svo kræklótt að halda mætti að þau væru í abstraktkeppni sín á milli. Og ekki hægt að ganga með góðu móti um garðinn fyrir úrsérbreiddum trjám. Væri ekki gaman að koma saman eins og eina helgi og tæma hlöðuna (sem inniheldur nú antík-hey) og jafnvel reyna að berja saman í nýja hurð fyrir hana svo hún verði vel aðgengileg að utan, og hreinsa upp garðinn svo hægt sé að ganga um hann á ný og setjast niður í skjóli innan um laufguð tré?
Tjáið ykkur nú endilega, elskurnar mínar.

2006-04-22T00:23:00.000Z

Stal þessu af Norninni sem stal því þar áður af Þarfagreini :

This Is My Life, Rated
Life:	7
Mind:	6.8
Body:	7.3
Spirit:	6.3
Friends/Family:	5
Love:	2.1
Finance:	7.1
Take the Rate My Life Quiz

Mér finnst ég nú hafa "skorað" ansi hátt í fjármálunum, en það virðist sem ein einasta spurning hafi haft þar úrslitavald. En ég er þó allavega ekki á hvínandi kúpunni. Ekki rík, en ekki dauð.

2006-04-17T13:58:00.000Z

Páskafrí senn á enda og kennsla tekur við að nýju á morgun. Því mun haldið norður í land nú á eftir (eftir stutt stopp í fermingarveizlu), í veðurspáða skafrenninginn og hálku á vegum. Þar sem mér er litið út um gluggann í Garðabænum á ég eiginlega erfitt með að trúa því að veðrið sé snjóugt og illfært einhversstaðar á landinu. Og að þangað sé ég að fara. Það er eiginlega bara sárt, í hjarta mér var ég farin að þrá vor og sólskin og yl og fagrar grundir. En svona er það bara. Vonandi sem styzt þó.

2006-04-14T15:55:00.000Z

Your Inner Child Is Surprised

You see many things through the eyes of a child.
Meaning, you're rarely cynical or jaded.
You cherish all of the details in life.
Easily fascinated, you enjoy experiencing new things.

How Is Your Inner Child?

2006-04-14T15:51:00.000Z

You Are Teal Green

You are a one of a kind, original person. There's no one even close to being like you.
Expressive and creative, you have a knack for making the impossible possible.
While you are a bit offbeat, you don't scare people away with your quirks.
Your warm personality nicely counteracts and strange habits you may have.

What Color Green Are You?

2006-04-14T15:24:00.000Z

Ég nenni engu. Svo mikið sem ég ætti og gæti verið að gera, en ég bara nenni því ekki. Sem væri kannski réttlætanlegt ef ég hefði ekki verið í fríi í gær og fyrradag líka og hefði átt að klára þá alla óunna leti og út-í-loftið horf. En letin lætur ekki að sér hæða. Það sem af er degi hef ég sett í eina þvottavél, lesið einn kafla í skáldsögu, skrifað eitt sendibréf og drukkið tvo kaffibolla. Og nú er ég eiginlega bara að bíða eftir að klukkan verði 16:05 svo ég geti farið að horfa á sjónvarpið. Er þetta hægt ?!!??

rétt vs. örv

2006-04-13T19:41:00.000Z

Ég er óskaplega rétt manneskja. Ekki nóg með að ég sé bæði rétthent og réttfætt, heldur er ég líka réttkjálkuð. Mig grunaði það svosem einhverntíman í "den" þegar ég reyndi að segja "edl" (eins og í bjalla) vinstra megin í munninum, en hef ítrekað verið að fá þann grun staðfestan á þessu ári. Bæði þegar jaxlinn var fjarlægður í janúar og nú þegar skrúfu var potað niður í holuna, á ég í hálfgerðum örðugleikum með að tyggja vinstra megin og þarf alltaf reglulega að halla höfðinu til vinstri svo tuggefnið (maturinn) renni þangað.
Ætli Da Vinci hafi verið jafnvígur á báðar kjálkahliðar? Sagan segir að hann hafi verið það á hendurnar á sér.

Skrúfukjaptur

2006-04-13T13:05:00.000Z

Í gær átti sú breyting á munnholi mínu sér stað, að skellt var skrúfu þangað sem einn af öftustu jöxlunum mínum átti sér fyrrum samastað. Það var þó ekki endajaxl sem fékk að víkja, enda eru þeir allir löngu horfnir á veiðilendurnar víðlendu, ef svo má segja. Nei, þessi jaxl fékk reisupassann í janúar, eftir uppsteit og aðvörun í kjölfarið. En í janúar var útséð með að þessi jaxl væri ekki lengur hæfur í starfi sínu og var dreginn öskrandi og íhaldssamur út af tveimur tannlæknum á heilum 50 mínútum. Ekki var það einungis jaxlgreyinu að kenna, heldur hinu trausta tannbeini sem af einhverjum [persónulegum] ástæðum neitaði að sleppa kauða.
En nú hefur verið fyllt upp í það skarð sem jaxlinn skildi eftir sig með manngjörðri og heldur ópersónulegri skrúfu sem verður svo krýnd seinnihluta sumars.

Og það er merkilegt hve lítil óþægingdi ég upplifði í kjölfarið af aðgerðinni, og bólgan lítil og löðurmannleg. Eins og ég var nú búin að búa mig andlega undir það versta og gott betur, sá fyrir mér að ég lægi sárkvalin uppi í rúmi allan daginn eftir aðgerðina og í dag, ófær um eitt né neitt nema þjást og vorkenna sjálfri mér. En nei, mér varð ekki kápan úr því klæðinu. Sem er vel.

19.13215 % geek

2006-04-08T20:27:00.000Z

+ Geekish Tendencies................................?09%
++ Geek.............................................?15%
+++ Total Geek......................................?25%
++++ Major Geek.....................................?35%
+++++ Super Geek....................................?45%
++++++ Extreme Geek.................................?55%
+++++++ Geek God....................................?65%
+++++++! Dysfunctional Geek.........................?75%

Niðurstaða : 75% Dysfunctional Geek, skv. Geek-prófi á netinu.

2006-04-08T19:23:00.000Z

Enn á ný í bænum, í þetta skiptið alveg fram að öðrum-í-páskum! Að vísu við það að játa á mig aukavinnu á mánudag og þriðjudag, en þar mun Íslendingsgenið að verki.

Ferðin heim gekk klakklaust en þó ekki alveg stresslaust. En ferðafélagalaust, og er það vel.

Mér hefur nú borist blómvöndur úr fjarlægum blómum, glitrandi og ægifagur. Að vísu bara huglægur, en fagur engu að síður.

stormur í fjarska, stormur í glasi

2006-04-06T18:17:00.000Z

Hinn margspáði síðviku-stormur Norðurlands hefur rétt aðeins kíkt í heimsókn á Skagaströnd, en ekkert til að tala um. Fært í bæinn á morgun ef veðrið helst svona. Páskafrí framundan, af hverju ég mun eyða einum morgni í tannbeinsskrúfuísetningu og nokkrum dögum í volæði og verkjum, ef svo fer sem spáð var. Svo, eftir marga, marga mánuði [þrjá til fjóra] fæ ég gervitönn ofan á skrúfuna. Mikil fjárútlát sem fylgja, en þess jaxl verður víst að koma. Svo mælti tannsi.

Spurning vikunnar (og næstu viku) :
Hvert skal verða næsta verkefni 6./7. bekkinga í smíði?

Mér hefur á síðustu dögum áskotnast nýútsprungið blóm sem vex einungis í ljósi fjarlægra stjarna, boð um draumfund við ungan mann hjá hinum rauða kristalli sem grætur bláum tárum, og dropi af fljótandi himni hins blákalda Parísarmorguns. Ekki slæmt það.

Landið og miðin

2006-03-30T10:14:00.000Z

Drottningin er upp risin að nýju og sest að á Skagaströnd. Fram í júní, þ.e.a.s.
Þar kennir hún 1.-8. bekk mynd- og handmennt ásamt smíðum. Fysta vikan brátt liðin og tilhlökkunin mikil, því hálfgert rótleysi hefur fylgt kennslunni þessa vikuna. Krakkarnir hafa verið kennaralausir síðan um síðustu mánaðarmót (í áðurnefndum greinum) og engin kennsluáætlun fyrir það sem eftir lifir vetrar, sem þýðir að maður hefur þurft að spila töluvert eftir andanum hverju sinni.

Nánari útlistanir síðar.

Það var svosem auðvitað

2006-03-09T20:21:00.000Z

Mér hefur borist kvörtun og er ég vel að henni komin, en hún fjallaði um [meinta] leti mína hér. Kannski hefur hún stafað af hugsana- og fréttaleysi, eða af netleysi (right!) , en ég tel þó öllu líklegra að færsluletin stafi af upptekt undirritaðrar. Það er nefnilega merkilega mikill tími sem fer í það að vinna og vera jafnframt að leita sér að vinnu. Jájá, allt vill konan og meira til.

En já. Á sunnudaginn var héldu Kammerkór Hafnarfjarðar og Kammersveit Hafnarfjarðar stórglæsilega og ofuráheyrilega Mozart-tónleika í Víðistaðakirkju, þar sem sveitin lék konsert ... og flutti svo Missa Solemnis ofl. ásamt kórnum.

Ég er byrjuð að vinna í bókhaldinu á Framkvæmdasviði Reykjavíkurborgar þar til ég fer norður á Skagaströnd (marslok - júníbyrjun) og hefur verið boðið starf þar í sumar. Ekki sem verst, þó starfið sé kannski ekki alveg það sem ég sá fyrir mér þegar ég var í LHÍ, þá eru launin betri en á Lansanum og möguleiki á yfirvinnu fyrir hendi. Skítt hvað umönnunarstörf og ófaglærð ríkisstörf eru illa launuð. Ég var nefnilega að spá í ákveðið umönnunarstarf í sumar, en þó sú vinna sé kannski meira gefandi en móttökuskráning reikninga, þá eru launin þar einhverjum tveimur þúsundköllum hærri en ritarastarf á Lsp. og það er bara skítlélegt. Finnst mér. Svo verður fróðlegt (eða ekki...) að vita hvað verður eftir sumarið. Kannski kemst ég í ásættanlegt skrifstofustarf með haustinu.

En morgundagurinn ber með sér ferðalag. Ég mun leggja land undir dekk og skreppa út á land að skoða staðarhætti og mannlíf á Skagaströnd. Svo kem ég bara heim einhverntíman um helgina.

2006-02-21T21:35:00.000Z

Stysta persónuleikapróf í heimi, en merkilega nákvæmt!

Your Personality Profile

You are elegant, withdrawn, and brilliant.
Your mind is a weapon, able to solve any puzzle.
You are also great at poking holes in arguments and common beliefs.

For you, comfort and calm are very important.
You tend to thrive on your own and shrug off most affection.
You prefer to protect your emotions and stay strong.

The World's Shortest Personality Test

Fyrsti dagur Góu / Konudagurinn

2006-02-19T13:00:00.000Z

Grimmur skyldi Góudagurinn fyrsti,
annar og sá þriðji,
og þá mun vel vora.
Sögðu forfeðurnir. Ergo; ömurlegt vor framundan ef marka má veðrið í dag.

2006-02-19T01:07:00.000Z

Merkilegt hvað bætiefnaskortur getur haft mikið að segja. Í dag var ég á fundi með fólki sem ég hef ekki hitt í mánuð eða svo, en fundaði töluvert með í janúar. Ég fann ekki fyrir því að þetta fólk hefði eitthvað breyst síðan þá, en munurinn á mér! Drottinn minn! Í janúar hafði ég þjáðst af járnskorti í að minnsta kosti 3 mánuði (nokkuð sem ég uppgötvaði síðustu mánaðarmót eða svo) og ég var svo rugluð og ringluð að það hálfa væri nóg. Ég var svo innilega ekki á sömu bylgjulengd og þau hvað hugstreymi og andlegt atgervi varðar að það var nánast orðið absúrd. Það versta (eða besta) var að ég fann mjög svo greinilega fyrir þessu og átti í þónokkrum vandræðum með að halda aftur af mér svo ég væri ekki endalaust að lýsa yfir áliti og hugmyndum sem voru yfirleitt bara lengst úti á túni. En í dag hef ég stundað járninntöku í nokkrar vikur (þrjár, eða svo) og ég er bara orðin eðlileg á ný. Allavega samfélagshæf.

Til hamingju, Ísland !

2006-02-19T00:38:00.000Z

Silvía Nótt sigurvegari kvöldsins. Mikið verður nú gaman í maí.

Mér finnst að við ættum strax að fara að plana framlag okkar að ári, eitthvað fyrirfram skipulagt þema og ákveða flytjendur. Svona forkeppni er ekkert sniðug nema lögin þar eigi sér einhvern einasta möguleika í Evrósýn, og það fannst mér bara ekki eiga við nema um í mesta lagi 4 lög af þessum sem komust í undanúrslitin í ár. ! Hin voru ýmist; sæmileg dægurlög sem hefðu ekki náð langt á alþjóðavísu því þau voru ekkert grípandi við fyrstu (eða aðra) hlustun og það bara virkar ekki þegar höfða á til fólks sem hefur eitthvað annað móðurmál en ensku/íslensku; eða bara eiginlega leiðinlega löng og einhæf lög.
En þetta hinsvegar, það að skipuleggja þemað og flytjendur gæti verið eitthvað sem þjóðin gæti sameinast í. Sviss setti bara saman hljómsveit úr allra þjóða kvikindum til að syngja sitt lag, af hverju ættum við ekki að gera slíkt hið sama? Ekki endilega úr allra þjóða kv., en einhverja 5-7 manna grúppu (með "p"-um, ekki "b") sem gæti flutt lagið sem samið var í þeim stíl sem þjóðin ákvað.

Mér finnst til dæmis að við ættum að senda sveit í Rammstein-stíl sem syngi eingöngu á íslensku.

Blindur er bóklaus maður

2006-02-17T20:54:00.000Z

Í dag fékk ég heimsendar og afhentar bækurnar sem ég pantaði á Amazon.com. Þær eru:
The Illustrator's Bible [fann ekki góða mynd]
Sacré Blues - an unsentimental journey through Québec
og síðast en ekki síst,
Clive Barker: Visions of Heaven and Hell
Ég hlakka mikið til að setjast niður og lesa/skoða.

fyrir brosvöðvana

2006-02-13T03:12:00.000Z

Jói keypti sér nýjan riffil og ákvað að fara á bjarndýrsveiðar til að reyna gripinn.
Hann fór til Alaska og til að gera langa sögu stutta, sá hann þar lítinn brúnan björn og skaut hann. Hann var varla kominn að bráðinni þegar hann fann þunga krumlu á öxlinni á sér, og þegar hann sneri sér við sá hann stóran svartan björn. Svarti björninn sagði: "Þetta voru mjög slæm mistök hjá þér, björninn sem þú skaust var frændi minn. Nú eru tveir kostir í stöðunni. Annaðhvort lem ég þig til dauða, eða ég nota þig til að ...sinna þörfum mínum." Eftir nokkra umhugsun ákvað Jói að samþykkja hið síðarnefnda, og svarti björnin tók til við að hjakkast á honum.
Jafnvel þótt hann væri aumur í 2 vikur náði Jói sér furðu vel og lofaði sjálfum sér að ná fram hefndum. Hann fór aðra ferð til Alaska þar sem hann fann svarta björninn og skaut hann til bana. Tveim mínútum síðar var bankað í öxlina á honum. Í þetta skipti var það risavaxinn skógarbjörn sem stóð við hliðina á honum. Skógarbjörninn sagði: "Þetta voru slæm mistök, Jói. Þetta var frændi minn og núna hefurðu tvo valmöguleika. Annaðhvort lem ég þig til dauða eða við stundum gróft kynlíf."
Aftur hugsaði Jói sig um og ákvað að það væri betra að vera samvinnufús frekar en að vera barinn til dauða. Hann lifði það af en það tók hann þónokkra mánuði að ná sér í þetta skipti. Nú var Jói gersamlega brjálaður, þannig að hann fór aftur til Alaska, fann skógarbjörninn og gjörsamlega dældi í hann blýinu. Hann fann sælutilfinningu hríslast um sig og taldi sig nú hafa náð fram hefndum, en hann var ekki kominn langt þegar bankað var enn einu sinni í öxlina á honum. Hann sneri sér við og sá risastóran ísbjörn fyrir aftan sig. Ísbjörninn leit á hann og sagði: "Viðurkenndu það, Jói... þú kemur ekki hingað til að veiða, er það?"

pirr pirr

2006-02-13T02:07:00.000Z

Ég missti mig svolíðið fyrr í kvöld í gagnrýni á annað fólk sem mér þótti vera með einhverja "holier than thou"-takta. Kannski ég haldi því bara áfram. Gagnrýninni altso.
Ég þoli t.d. ekki þegar fólk heimfærir eigin upplifun eða hegðun eða annað persónulegt yfir á mig. Einhverntíman var vinkona að útskýra fyrir mér hvað sér þætti gott (fyrir sálina) að fara á AA-fundi og lauk ræðunni með því að klykkja út úr sér: "Það er áreiðanlega svona svipað og fyrir þig að fara á fundi hjá Ásatrúarfélaginu." "Nei," hreytti ég út úr mér, "þangað fer ég til að hitta kunningja og spjalla, ekki fyrir einhverja andlega upplifun!" Þess má geta að þessi vinkona hefur aldrei komið á blót eða opið hús hjá Ásatrúarfélaginu að mér vitandi, og því ekki í neinni aðstöðu til áætla neitt um almenna stemningu á slíkum samkomum. Fyrir nokkrum vikum var ég í skírnarveislu þar sem "gervi"neglur annarar vinkonu minnar bárust í tal. Reyndar eru þetta hennar neglur að mestu, en styrktar til muna með þykku geli. Gæði þeirra sagði hún m.a. fólgin því að svona þykkar væru þær svo mjúkar viðkomu og hentuðu t.d. vel til bakklórs. Óstyrktar væru neglurnar á henni, og líkast til mér líka, svo hvassar viðkomu. Þess má geta að mínar eigin neglur eru mun þykkari/sterkari en hennar, en það gat hún kannski ekki vitað svona í óspurðum fréttum. Mig langaði hinsvegar mest til að segja eitthvað í þessa áttina: "Já, er það? Ég hef bara ekki tekið eftir að mínar neglur væru neitt sérlega hvassar, en þú hlýtur að vera með allar svona staðreyndir á hreinu."
Mér finnast svona atvik sambærileg því ef ég færi að heimfæra erfiðleika mína í hinu og þessu upp á alla aðra; "Ég á svo erfitt með að byrja á stóru verkefni, en það átt þú nú áreiðanlega líka!" Og ég veit ekki alveg hvað mér finnst um þetta [orð óskast], stundum finnst mér þetta svo mikil yfir-þig-hafin hegðun, þó ég reikni ekki með að þetta sé illa meint.
Líklegast er fólk að réttlæta eigin veikleika, hegðun eða ókosti með því að fullyrða að viðmælandinn sé eins, áður en hann fær tækifæri til að setja neikvætt formerki við þann veikleika/ókost í huganum.

Sokkar eru ekki allir þar sem þeir eru séðir

2006-02-10T13:25:00.000Z

Uppáhaldsflíkin mín þessa dagana eru ökklahlífar. Hvítar og úr ull, prjónaðar af ömmu minni í "denn". Þær halda hita á ökklunum á mér og eru ósköp notalegar. Það sem gerir þessar ökklahlífar sérstakar er að þær eru nú í sínu (fyrsta) framhaldslífi. Upprunalega voru þær efri partur (legg-partur) á ullarhosum sem ég gekk í sundur á tá og hæl nokkrum sinnum, en sem var alltaf skeytt saman aftur. Þegar sú stund rann upp að ekki þótti taka því að hefja enn eina björgunaraðgerðina, tók móðir mín sig til og aflimaði fót af legg hosanna (og gekk frá endum svo ekki myndi leggjunum blæða/rakna út) svo nú eru þetta ökklahlífar. Þegar lífi þeirra sem ökklahlífa lýkur er rétt möguleiki að þær geti átt sér framhaldslíf sem úlnliðshlífar, hver veit?

Lesið upp úr jólagjöfunum :

2006-02-06T17:43:00.000Z

Úr bókinni 101 rappe svar til kvinder

Han: "Hej, jag hedder Dan, du må hellere huske det, for du kommer til at skrige det hele natten."
Du: "Dan, du har åbenbart fået at vide, at du bare skal være dig self. Det var et rigtig dårligt råd."
--------
Når dur bliver forfremmet, og mænd kommer med hentydninger til, at du har bollet dig til tops, siger du:
"Men så er det jo bare mit held, at du er så ligegyldig her i firmaet, at jag ikke behøvede at knalde med dig!
--------
Når du får e-mails, der truer dig med død og ødelæggelse, hvis du ikke straks sprøjter den videre ud i cyberspace, svarer du til afsender:
"Det var pænt af dig at sende mig det her kædebrev. For at vise min begejstring kvitterer jeg lige med en virus. Der sku' også være nok til alle de andre på din adresseliste. Værsgo!"
eller
"Lone (eller hvad du nu hedder) er ikke længere at finde på denne mail-adresse. Hun sendte ikke din mail videre til alle, hun kender, fandt derfor aldrig kærligheden, lykken eller meningen med livet. Hun døde pludselig - alene og uden håb for femtiden. Og det er så din skyld ..."